قصيدة : مش مستهله ده كله يا ناس... بقلم الشاعر : د علي ابراهيم عيد

مش مستهله ده كله يا ناس
نبقي عبيد للمال حراس
 مهما كنت ع الدنيا تكوش
وفي الأموال تشيل وتحوش
آخرك إيه غير متر قماش
يلفوك فيه بالطول والعرض

بتيجي الدنيا وحيد عريان
وتخرج منها زي ما جيت
لا بتاخد وياك اطيان
ولا عزبه وفلا ولا بيت
بتدخل فرد وتخرج فرد

يبقي ليه نظلم بعضينا
وتتقطع بينا الأرحام
ونزرع غل من حوالينا
وتبقي حياتنا حرام ف حرام
ونحصد كره واسوه وحقد
وعشان نعلي ندوس علي بعض
وإحنا عارفين اخرة خطاوينا
متر ف متر ف حفره ف أرض

عملك أملك هو حياتك
هو الباقي بعد مماتك
طاعة ربك فيها نجانك
طهر قلبك وتحفظ ذاتك
تنجي بنفسك يوم العرض # د. علي عيد